Ministri për Evropën dhe Punët e Jashtme, Igli Hasani, priti sot në Tiranë Ambasadorin Lamberto Zannier, Kreun e Misionit të Vëzhguesve të OSBE/ODIHR, i cili do të ndjekë nga afër zgjedhjet e përgjithshme parlamentare që do të mbahen më 11 maj në Shqipëri. Ky takim nënvizon rëndësinë që qeveria shqiptare i jep proceseve zgjedhore të lira dhe të ndershme, në përputhje me standardet ndërkombëtare.
Gjatë bisedimeve, Ministri Hasani theksoi mirënjohjen e Shqipërisë për angazhimin dhe ndihmën e OSBE/ODIHR në mbrojtjen e integritetit të zgjedhjeve. Ai nënvizoi vendosmërinë e qeverisë shqiptare për të zbatuar të gjitha rekomandimet e dala nga raportet e mëparshme të misionit vëzhgues, duke e cilësuar kontributin teknik e institucional të ODIHR si thelbësor për forcimin e demokracisë në vend.
“Shqipëria vlerëson fort asistencën e OSBE/ODIHR gjatë proceseve zgjedhore dhe ne mbetemi të vendosur për të zbatuar rekomandimet, duke shfrytëzuar njëkohësisht ekspertizën dhe ndihmën e tij”, deklaroi Hasani.
Takimi dëshmoi angazhimin e vazhdueshëm të Shqipërisë për të garantuar një proces zgjedhor gjithëpërfshirës, transparent dhe në përputhje me të gjitha standardet ndërkombëtare për zgjedhje të drejta. Ministri Hasani theksoi se bashkëpunimi me OSBE/ODIHR është një dëshmi e palëkundur e përkushtimit të vendit tonë ndaj parimeve demokratike dhe lirive themelore të qytetarëve.
Ky angazhim është gjithashtu në përputhje me rrugëtimin evropian të Shqipërisë, ku standartet zgjedhore janë një ndër elementët themelorë që ndihmojnë në konsolidimin institucional dhe në rritjen e besimit të qytetarëve në proceset demokratike.
