Pas shumë zërave që kanë qarkulluar gjatë gjithë sezonit, duket se e ardhmja e Mohamed Salah te Liverpool ka marrë një kah të qartë. Sulmuesi egjiptian, një nga figurat më emblematike të “The Reds” në dekadën e fundit, pritet të largohet përfundimisht nga klubi gjatë merkatos së verës, me një transferim të mundshëm pa kosto, pasi kontrata e tij po shkon drejt skadimit dhe sinjale për rinovim nuk ka.
Salah ka qenë një nga pikat kyçe të suksesit të Liverpool nën drejtimin e Jurgen Klopp, me gola të rëndësishëm dhe paraqitje të pazëvendësueshme në Premier League dhe arenën europiane. Megjithatë, duket se ambiciet personale dhe ofertat marramendëse – veçanërisht nga klubet e pasura të Lindjes së Mesme – po ndikojnë në vendimin e 31-vjeçarit për ta mbyllur këtë kapitull suksesi me anglezët.
Ndërkohë, drejtuesit e Liverpool kanë filluar të veprojnë konkretisht për zëvendësimin e egjiptianit. Emri që po përflitet me më shumë insistim është ai i Federico Chiesa-s, yllit të Juventus dhe kombëtares italiane. 26-vjeçari ka rënë në syrin e skautëve të “The Reds” dhe konsiderohet si një profil ideal për të zëvendësuar Salah, për shkak të teknikës, shpejtësisë dhe fleksibilitetit që ofron në sulm.
Përveç Chiesa-s, klubi ka në radar edhe disa talente premtuese të Bundesligës dhe Ligue 1, teksa synohet ndërtimi i një skuadre të re pas largimit të Klopp në fund të sezonit. Ndryshimet në Anfield janë të pashmangshme dhe largimi i Salah do të jetë një nga momentet më emocionuese, që shënon fundin e një epoke të lavdishme në histori të klubit anglez.
