Personi që shihni në foton e publikuar është Eris Mehmetaj, i cili u ndalua nga policia në Tiranë, nën dyshimet për përfshirje në atentatin ndaj Rustem Hoxhajt, ngjarje kjo e ndodhur mëngjesin e së dielës në Vlorë. Mehmetaj, me origjinë nga Tropoja, sipas burimeve nga organet hetimore, dyshohet të jetë një nga autorët kryesorë të sulmit fatal që i mori jetën Hoxhajt me armë zjarri.
Burime nga grupi hetimor bëjnë me dije se atentati mund të ketë qenë i porositur nga persona të lidhur me rrjete kriminale jashtë vendit, konkretisht me seli në Dubai, një tendencë kjo gjithnjë e më shqetësuese në aktivitete të ngjashme kriminale në Shqipëri. Dyshimet për përfshirje ndërkombëtare janë shtuar për shkak të stilit të organizimit të ngjarjes dhe kontakteve të mundshme të Mehmetajt me individë të dyshimtë në Emiratet e Bashkuara.
Eris Mehmetaj, i njohur edhe për lidhjen e tij me viktimën e një tjetër atentati, Roan Brahimi (i njohur ndryshe si Sidorel Prendi), ka qenë më parë në radarët e policisë për çështje të tjera të natyrës kriminale. Kjo lidhje me Brahimin ka bërë që hetuesit të konsiderojnë atentatin ndaj Hoxhajt jo si një akt të izoluar, por si pjesë e një zinxhiri hakmarrjesh dhe përplasjeve të grupeve kriminale.
Në këtë fazë, hetimet janë ende në zhvillim dhe autoritetet janë fokusuar në zbardhjen e motivit real të vrasjes, si dhe në identifikimin e personave të tjerë që mund të kenë bashkëpunuar në organizimin dhe realizimin e këtij atentati. Roli i Mehmetajt pritet të sqarohet përmes dëshmive dhe analizës së provave të mbledhura në vendngjarje.
