Shqiptarët në diasporë do të kenë mundësi të votojnë në zgjedhjet e 11 majit, një hap historik për përfshirjen e tyre në proceset demokratike të vendit. Kryeministri Edi Rama, nga Kreta në takimin me komunitetin shqiptar në Greqi, theksoi rëndësinë e këtij momenti, duke thënë se “është një mundësi aktuale që Shqipëria të integrohet në Bashkimin Evropian”.
“246 mijë shqiptarë janë regjistruar për të votuar në këto zgjedhje, dhe prej tyre 65 mijë ndodhen në Greqi. Kjo tregon se diaspora është jo vetëm e gatshme të kontribuojë në zhvillimin e Shqipërisë, por edhe në forcimin e demokracisë,” u shpreh Rama.
Kryeministri vuri në dukje se përfshirja e emigrantëve në procesin zgjedhor është një e drejtë e fituar me shumë vështirësi dhe se kjo përfshirje i jep një dimension të ri zgjedhjeve. Ai shtoi se “asnjë forcë tjetër politike nuk e ka mbështetur këtë iniciativë, sepse i druhej votës së atyre që e njohin vlerën e punës dhe sakrificës.”
Rama i bëri thirrje qytetarëve jashtë kufijve që të bëhen pjesë e këtij vizioni për integrimin në BE. Sipas tij, çdo votë është pjesë e një rrugëtimi më të madh për të çuar Shqipërinë drejt standardeve evropiane.
“Të mos e lëmë të shuhet kjo rreze e mundësisë,” u shpreh ai, duke përmendur aspiratën për një Shqipëri të integruar, ku çdo shqiptar të mund të ndihet qytetar evropian, pa u ndarë nga vendlindja nëpërmjet distancës ose indiferencës.”
Ky është një moment kyç, kur diaspora shqiptare gëzon më shumë se kurrë peshë politike dhe mundësi për të ndikuar në të ardhmen e vendit që ka rrënjët në shpirtin e secilit prej tyre.
