Ditën e sotme përfundoi me sukses aktiviteti katër ditor i zhvilluar në kryeqytet, i cili përfshiu Turneun Ballkanik të Padelit, një ngjarje që për herë të parë solli kaq shumë emocion dhe cilësi sportive në vendin tonë. Nën drejtimin dhe përkushtimin e administratorit të “Albania Padel Group”, Alessandor Pallini, ky organizim tregoi se Shqipëria është gati të mirëpresë aktivitete të nivelit të lartë në një disiplinë sportive që po fiton gjithnjë e më shumë vëmendje ndërkombëtare.
Pjesëmarrja ishte mbresëlënëse, me sportistë nga vende të ndryshme të rajonit dhe më gjerë, përfshirë Italinë, Greqinë, Turqinë dhe Spanjën. Të apasionuarit pas Padelit patën mundësinë të ndjekin ndeshje të nivelit të lartë, ku përballjet ishin të forta deri në pikën e fundit dhe emocionet nuk munguan në asnjë moment.
Finalet e ditës së fundit u karakterizuan nga dinamika të mëdha dhe spektakël sportiv, duke tërhequr vëmendjen e publikut vendas dhe ndërkombëtar. Me tifozë të shumtë në tribuna dhe atmosferë entuziaste, mbyllja e aktivitetit theksoi edhe një herë potencialin turistik dhe sportiv të vendit tonë.
Organizimi rezultoi jo vetëm në një sukses sportiv, por edhe një hap të rëndësishëm në promovimin e Shqipërisë si një destinacion i ri për sportet e reja si Padeli. Infrastruktura moderne, mikpritja dhe niveli i garës treguan se ne jemi të përgatitur për sfida edhe më të mëdha në të ardhmen. Ky turne shënon një kapitull të ri për padelin në Shqipëri dhe një nxitje për zhvillimin e mëtejshëm të sporteve alternative në vend.
