Një ngjarje tronditëse ka goditur institucionet e sigurisë në Maqedoninë e Veriut. Angel Samarakov, pjesëtar i sigurimit të kryeministrit Hristijan Mickoski dhe ish-punonjës i Ministrisë së Punëve të Brendshme, është arrestuar në flagrancë për dyshime serioze mbi dhënien e informacioneve sekrete grupeve të krimit të organizuar.
Arrestimi ndodhi në lagjen “Grcec” të Shkupit, një zonë e njohur për aktivitetin kriminal dhe praninë e bandave të rrezikshme. Sipas burimeve zyrtare të Ministrisë së Brendshme, Samarakov u kap duke komunikuar me individë ende të paidentifikuar, të cilëve, siç dyshohet, po u dorëzonte të dhëna konfidenciale.
Nuk është bërë ende e ditur natyra e informacionit të dhënë, apo nëse ato janë të lidhura drejtpërdrejt me veprimtarinë e qeverisë apo me sigurinë personale të kryeministrit. Autoritetet kanë nisur një hetim të thelluar për të zbuluar përmasat e ngjarjes dhe lidhjet e mundshme me rrjete më të gjera kriminale.
Ky nuk është rasti i parë problematik brenda ekipit të sigurimit të Mickoskit. Muaj më parë, shefi i sigurimit të tij, Ivica B., u përfshi në një incident të dhunshëm kur pengoi një operacion policor në një lokal në Shkup, i lakuar për veprimtari të dyshimta. Ai sulmoi fizikisht një koleg të tij, duke ngritur shqetësime të mëdha për profesionalizmin dhe integritetin e truprojave të kryeministrit.
Skandalet e njëpasnjëshme në radhët e personelit të sigurisë kanë ngritur alarm për rrezikun që këto figura mund të përfaqësojnë për strukturat shtetërore. Opinioni publik dhe institucionet presin transparencë dhe masa të rrepta për të rikthyer besimin në organet e rendit.
