Presidenti amerikan Donald Trump ka reaguar pas aksidentit tragjik me helikopter që ndodhi në lumin Hudson, duke shprehur dhimbje të thellë për viktimat dhe familjet e tyre. Në një postim në platformën e tij Truth Social, ai shkroi: “Aksident i tmerrshëm me helikopter në lumin Hudson. Duket se gjashtë persona – piloti, dy të rritur dhe tre fëmijë – nuk janë më. Pamjet janë të tmerrshme. Po punojmë për zbardhjen e plotë të ngjarjes dhe për të ndihmuar autoritetet lokale.”
Sipas autoriteteve të emergjencës së Nju Jorkut, helikopteri privat tip Eurocopter AS350 u rrëzua rreth orës 15:45 në mes të lumit Hudson, në një zonë të frekuentuar për qëllime turistike. Dëshmitarët raportuan se helikopteri dukej se kishte probleme teknike para se të përplasej në ujë, ndërsa pamjet e siguruara nga kamerat e sigurisë dhe telefonat celular tregojnë momentin e rrëzimit dhe përpjekjet e para për shpëtim.
Ekipet e kërkim-shpëtimit arritën shpejt në vendin e ngjarjes, por fatkeqësisht, të gjashtë pasagjerët u nxorën pa shenja jete. Trupat e tyre u transportuan në mjekësinë ligjore për procedurat e mëtejshme, ndërkohë që hetimet po vazhdojnë në bashkëpunim me Administratën Federale të Aviacionit (FAA) dhe Bordin Kombëtar të Sigurisë së Transportit (NTSB).
Trump theksoi rëndësinë e një hetimi të shpejtë dhe transparent për të shmangur aksidente të tilla në të ardhmen. Ai gjithashtu falënderoi ekipet e shpëtimit për reagimin e tyre të menjëhershëm dhe profesional. “Një tragjedi që nuk duhet harruar,” përfundoi ai. Ndërkohë, rriten thirrjet për rregulla më të rrepta mbi sigurinë e fluturimeve turistike nëpër zonat urbane.
