Ekipi Under 11 i Akademisë Triumf ka shkruar historinë në futbollin e moshave, duke fituar me plot meritë turneun ndërkombëtar Yes Cup që u zhvillua në Milano të Italisë. Në një turne ku morën pjesë akademi elitare nga Europa, Triumph U11 tregoi talent, disiplinë dhe një lojë moderne që la pas shumë emra të mëdhenj të futbollit të të rinjve.
Në finalen e madhe, djemtë e moshës 11-vjeçare përballuan sfidën më të vështirë: Quens Park Rangers (QPR), një nga akademitë më prestigjioze të futbollit anglez. Por Triumph U11 jo vetëm që fitoi, por e bëri në mënyrë dominuese, duke e “shpartalluar” QPR si në lojë ashtu edhe në rezultat. Performanca në finale ishte kulmi i një paraqitjeje mbresëlënëse në të gjithë turneun, ku ekipi shqiptar spikati për organizim të shkëlqyer në fushë, teknikë individuale si dhe shpirt të lartë gare.
Fitorja në Yes Cup ka rëndësi të madhe për futbollin shqiptar të moshave dhe është një dëshmi e punës së palodhur që bëhet në akademinë Triumf. Ky sukses tregon që me përkushtim dhe vizion të qartë, është e mundur që edhe ekipet shqiptare të konkurrojnë me sukses në nivele më të larta ndërkombëtare.
Trajnerët dhe stafi drejtues vlerësojnë këtë fitore si një frymëzim për brezat e rinj dhe një motivim i madh për të investuar ende më shumë në zhvillimin e talenteve të reja. Fitorja e Triumph U11 në Milano është më shumë se një trofe – është një mesazh i fortë se e ardhmja e futbollit shqiptar ka baza të shëndosha dhe ambicie për të synuar majat e Europës.
