Në apartamente të zakonshme në Tiranë, shumë prej të cilave ofrohen me qira ditore, po lulëzon një formë e re e prostitucionit ndërkombëtar. Një rrjet i organizuar po sjell gra nga Amerika Latine, veçanërisht nga Brazili, duke shfrytëzuar Shqipërinë si një hallkë të re të tregtisë globale të trupit.
Një shtetase braziliane, që kërkon të mbetet anonime, tregon për mënyrën si funksionon rrjeti. Ajo erdhi në Tiranë me një vizë turistike dhe u sistemua në një apartament të marrë me qira nga ndërmjetës vendas. “Nuk njoh askënd këtu; çdo gjë menaxhohet përmes telefonit. Fitimet? I ndaj përgjysmë me menaxherin,” thotë ajo.
Kjo është një skemë e mirëorganizuar. Vajzat rekrutohen në qytete të mëdha të Amerikës Latine dhe udhëzohen nga dhjetëra profile anonime në rrjetet sociale. Pasi arrijnë në Shqipëri, ato mbikëqyren përmes aplikacioneve të komunikimit dhe shërbimet e tyre reklamohen ”fshehurazi” në platforma të njohura.
Përfituesit kryesorë janë rrjetet mafioze që kontrollojnë levizjet, pagesat dhe “klientët”. Ato përdorin metoda gjithnjë e më të sofistikuara për të shmangur kontrollin e autoriteteve. Nga ana tjetër, institucionet shqiptare shpesh reagojnë vetëm pas denoncimeve ose operacioneve të koordinuara me agjenci ndërkombëtare.
Ndërkohë, mungesa e strategjive të qëndrueshme për identifikimin dhe rehabilitimin e viktimave e bën situatën edhe më shqetësuese. Kjo tregon për boshllëqe të mëdha në bashkëpunimin ndërinstitucional dhe mungesën e vullnetit politik për të luftuar realisht këtë fenomen.
Çështja kërkon një reagim të menjëhershëm dhe të koordinuar mes shteteve, përndryshe Shqipëria do të vazhdojë të shndërrohet në një nyje të rëndësishme të tregtisë ndërkombëtare me njerëz.
