Pas një periudhe të vështirë me 5 humbje në 8 ndeshjet e fundit, Marseille i drejtuar nga tekniku italian Roberto De Zerbi është rikthyer në formë me një fitore të thellë 5-1 ndaj Montpellier në kuadër të javës së 30-të të Ligue 1. Ndeshja që u zhvillua në Stade Vélodrome shënoi një moment festiv për tifozët vendas, që panë skuadrën e tyre jo vetëm të triumfojë bindshëm, por edhe të ngjitet në vendin e dytë në renditje, duke parakaluar Monacon që nuk shkoi më shumë se një barazim pa gola kundër Strasbourg.
Pas ndeshjes, De Zerbi nuk e përmbajti shpërthimin emocional. “Më keni bërë kriminel,” tha ai me një buzëqeshje ironike në konferencën për shtyp, duke iu referuar kritikave intensive që ka marrë nga media dhe tifozët gjatë javëve të fundit. Trajneri italian theksoi se presioni për të kthyer rezultatet në favor është i madh, por ftoi kritikët të kenë më shumë durim dhe mirëkuptim për punën e bërë.
Fitorja ndaj Montpellier-it nuk ishte vetëm një rikthim në rezultat, por edhe një demonstrim force taktike. Marseille dominoi lojën nga minuta e parë, me një sistem loje më agresiv dhe efikas në fazën sulmuese, ku spikatën disa nga emrat kryesorë të formacionit.
Ky sukses i jep Marseilles jo vetëm moral për pjesën e mbetur të sezonit, por edhe një shans real për një vend në Champions League. Me një kalendar të ngjeshur përpara, mbetet për t’u parë nëse De Zerbi dhe skuadra e tij do ta mbajnë këtë ritëm deri në përfundim të kampionatit.
