Trafiku në Tiranë është kthyer në një nga sfidat më të mëdha urbane për banorët e kryeqytetit. Çdo mëngjes dhe pasdite, rrugët mbushen me automjete që ngadalësojnë qarkullimin dhe shkaktojnë pritje të gjata. Në këtë situatë të përkeqësuar ndikon drejtpërdrejt edhe fakti që mbi 1/3 e automjeteve të regjistruara në vend janë të përqendruara në Tiranë.
Kjo shifër alarmante tregon jo vetëm për një përdorim të lartë të automjeteve private, por edhe për një mungesë të theksuar të alternativave efektive të transportit publik. Shtimi i ndërtimeve të reja shumëkatëshe pa një plan të mirëfilltë urban për infrastrukturën rrugore e ka përkeqësuar problemin. Rrugët ekzistuese nuk e përballojnë më fluksin e mjeteve që dalin çdo ditë nga oborret e pallateve të reja.
Për më tepër, gjetja e një vendi parkimi është bërë një betejë më vete. Shumë qytetarë shprehen të zhgënjyer nga mungesa e hapësirave publike për parkim, ndërsa në zonat qendrore edhe çmimet e parkimit me pagesë janë rritur ndjeshëm. Pronarët e mjeteve shpesh detyrohen të parkohen në vende të ndaluara, duke rrezikuar gjoba ose bllokim të automjetit.
Zgjidhja afatgjatë kërkon reformim të strukturës urbanistike të kryeqytetit dhe inkurajim të përdorimit të transportit publik efikas dhe të kombinuar me biçikleta apo mjete elektrike. Ndërtimet e reja duhet t’i përgjigjen një plani të qartë që parashikon gjithashtu nevojat e parkimit dhe infrastrukturën mbështetëse.
Pa një ndërhyrje serioze dhe të mirëkoordinuar, Tirana rrezikon të mbingarkojë kapacitetin e saj urban dhe të kthehet në një qytet ku lëvizja bëhet gjithnjë e më e vështirë.
