Pasi Gjykata e Apelit të Posaçëm refuzoi kërkesën për lirimin e tij, Erion Veliaj duket se është pozicionuar në periferi të mbështetjes politike dhe publike. Pas arrestimit të tij në kuadër të hetimeve të SPAK për korrupsion dhe shpërdorim detyre, sytë e opinionit publik janë kthyer edhe nga veprimet dhe heshtjet digjitale të figurave politike pranë tij. Në këtë kuadër, një vështrim më i afërt mbi profilin e Facebook-ut të Veliajt tregon më shumë se sa pritet.
Mungesa e reagimeve nga aleatët e tij të ngushtë dhe mungesa e postimeve mbështetëse sinjalizojnë një ftohje të dukshme, në një moment kur tradicionalisht përfaqësuesit politikë solidarizohen me kolegët e tyre të përballur me drejtësinë. Për më tepër, analiza e ndërveprimeve në rrjet tregon se edhe strukturat e zakonshme të PR-it të Veliajt kanë rënë në heshtje, një tregues i fortë se ai nuk gëzon më të njëjtën mbështetje brenda Partisë Socialiste.
Kjo mungesë e mobilizimit dixhital, e pazakontë për profilin e tij, mund të interpretohet si shenjë ‘tradhëtie’ politike – një lënie të qëllimshme në harresë për të mos dëmtuar imazhin e përgjithshëm të qeverisë apo partisë në prag zgjedhjesh.
Facebook-u i Veliajt, me aktivitet minimal dhe pa deklarata mbrojtëse, në këtë kontekst bëhet një indikator i heshtur por shumë domethënës i realitetit të tij aktual: distancimit dhe izolimit, jo vetëm nga drejtësia por edhe nga aleatët. Siç duket, dalja e tij nga skena politike është më e shpejtë se sa largimi fizik nga zyra e bashkisë.
