Shefja e diplomacisë së Bashkimit Evropian, Kaja Kallas, ka ngritur alarmin për përshkallëzimin e tensioneve në Ballkanin Perëndimor, duke theksuar nevojën urgjente për të përshpejtuar procesin e zgjerimit të BE-së në këtë rajon. Deklarata e saj u bë para takimit të Këshillit për Punë të Jashtme në Luksemburg, ku ajo theksoi se blloku “ka nevojë për histori suksesi” në përpjekjet e stabilizimit të rajonit.
Edhe pse Kallas nuk përmendi ndonjë shtet specifik, zhvillimet e fundit në Bosnje e Hercegovinë dhe në marrëdhëniet Kosovë-Serbi janë burime të qarta shqetësimi. Veprimet e autoriteteve në Republika Sërpska për largim të mundshëm nga Bosnja kanë ngjallur shqetësime ndërkombëtare, përfshirë reagime nga NATO dhe Shtetet e Bashkuara, të cilat kanë sinjalizuar se nuk do të lejojnë cenimin e paqes dhe stabilitetit në vend.
Ndërkohë, përplasjet e vazhdueshme mes Kosovës dhe Serbisë kanë mbetur të pazgjidhura prej kohësh. Tensionet u përshkallëzuan ndjeshëm në vitin 2023, me përplasjen e dhunshme në Banjskë, ku mbeti i vrarë një rreshter i Policisë së Kosovës dhe tre sulmues serbë. Ngjarja vuri në pah brishtësinë e sigurisë në veri të Kosovës, teksa Beogradi dhe Prishtina vazhdojnë të akuzojnë njëra-tjetrën, duke zbehur perspektivën për një marrëveshje përfundimtare.
Kallas, përmes angazhimit të saj diplomatik dhe takimeve me liderët e rajonit, nënvizon se integrimi europian është çelësi për stabilitetin afatgjatë të Ballkanit. Ajo nënvijëzon rëndësinë e dialogut dhe ndërtimit të besimit reciprok si mjete për të shmangur konfliktet dhe për të siguruar paqe të qëndrueshme.
