Profesori i kriminalistikës, Ervin Karamuço, deklaroi në një intervistë për “Review” në Euronews Albania se hakerimi i fundit ndaj tre prokurorëve të SPAK nuk është një veprim i zakonshëm, por një operacion me sfond të qartë politik. Ai u shpreh se pas këtij sulmi qëndrojnë më shumë persona sesa dy të arrestuarit e deritanishëm, duke sugjeruar prezencën e një dirigjenti politik që ka planifikuar ndërhyrjen për qëllime të caktuara.
Sipas Karamuços, objektivi nuk është thjesht dëmtimi i reputacionit të individëve të përfshirë në hetime, por goditja e funksionit të SPAK-ut si institucion i pavarur që po ndjek çështje të ndjeshme korrupsioni dhe krimi të organizuar. Prandaj, dëmi real shkon përtej ekspozimit të disa e-maileve, pasi në thelb dëmtohet besimi i publikut ndaj strukturave të drejtësisë dhe vetë procesit të reformës në drejtësi.
Ai theksoi se mënyra e organizimit të sulmit tregon për një mbështetje teknike të avancuar, çka nuk është e arritshme për një individ të vetëm apo grup amatorësh. Për më tepër, publikimi i informacionit të përzgjedhur nga email-et e prokurorëve synonte të manipulonte perceptimin publik dhe të ushtronte presion mbi vendimmarrjen e SPAK.
Karamuço sugjeron që, për të zbardhur të gjithë zinxhirin përgjegjës, hetimet duhet të shkojnë më thellë dhe të kërkojnë bashkëpunim ndërinstitucional, pasi janë në rrezik jo vetëm personat e përfshirë, por edhe e ardhmja e shtetit ligjor në Shqipëri. Ai përfundoi duke theksuar nevojën për mbrojtjen e të dhënave sensitive dhe për rritjen e sigurisë kibernetike të institucioneve të drejtësisë.
