Franca është tronditur nga një valë sulmesh të dhunshme të kryera në mbrëmjen e së hënës ndaj disa institucioneve të sigurisë së lartë, përshirë burgje dhe zona përreth tyre. Përplasjet nisën rreth orëve të vona të mbrëmjes, me automjete të djegura dhe të shtëna me armë zjarri pranë ambienteve të burgjeve në disa qytete kryesore, përfshirë Marsejën, Grenoblin dhe Lionin.
Ministri i Brendshëm, Gérald Darmanin, konfirmoi incidentet përmes një postimi në platformën X (ish-Twitter), duke i cilësuar sulmet si “akte jashtëzakonisht të rrezikshme dhe të papranueshme që synojnë të sfidojnë institucionet e rendit publik dhe sistemin e drejtësisë franceze.” Darmanin shtoi se masat e sigurisë janë përforcuar në të gjitha burgjet dhe qendrat penale të vendit.
Sulmet kanë ngjallur shqetësim të gjerë në opinionin publik francez, mes zërave që lidhin këto akte me tensionet në rritje mes grupeve të krimit të organizuar dhe autoriteteve. Burime nga policia kanë sqaruar se sulmet janë të koordinuara dhe kanë për qëllim të pengojnë punën e strukturave të drejtësisë në luftën kundër rrjeteve të trafikut të drogës dhe aktiviteteve kriminale brenda burgjeve.
Aktualisht janë shpallur hetime të plota për të identifikuar autorët dhe organizatorët e këtyre sulmeve. Gjatë natës, janë arrestuar disa persona të dyshuar për përfshirje në incidentet me zjarrëvënie dhe armë zjarri, ndërsa autoritetet kanë sqaruar se nuk ka viktima, vetëm dëme materiale.
Qeveria franceze thekson se nuk do të tolerojë kurrfarë akti që cenon sigurinë institucionale, ndërsa organizatat për të drejtat e njeriut kanë shprehur shqetësim mbi mundësinë e rritjes së kontrollit të ashpër të brendshëm në emër të sigurisë.
