Nga lufta për mbijetesë deri te gara për “Final Four”, Superiorja mbetet e tensionuar dhe interesante. Me vetëm dy javë të mbetura deri në fund të kampionatit, çdo pikë është vendimtare. Në këtë atmosferë të zjarrtë, ish-trajneri dhe analisti i njohur, Sulejman Starova, ofroi një analizë të thelluar në një intervistë për Sport News në News 24.
Sipas Starovës, formati i ri me “Final Four” ka sjellë më shumë rivalitet dhe dinamikë, duke bërë që skuadrat të mbështesin këtë sistem si një mundësi për të qëndruar në garë deri në momentet e fundit. “Gjithçka është e hapur. Ky format i jep frymëmarrje edhe atyre që nuk e kanë nisur mirë sezonin,” theksoi ai.
Ndërkohë, ai ndalet veçanërisht te Tirana, një nga klubet më të suksesshme historikisht, por që këtë sezon po përballet me probleme të theksuara. “Tirana është skuadra e kontradiktave. S’ka stabilitet as në lojë as në rezultate. Janë realisht në rrezik,” paralajmëroi Starova, duke e quajtur këtë një sezon zhgënjyes për bardheblutë.
Në anën tjetër, ai analizoi edhe skuadrat e tjera të mëdha si Partizani dhe Vllaznia, që sipas tij kanë potencial për të bërë diferencën në fazën përfundimtare, por shpesh mungesa e vazhdimësisë në rezultate i penalizon.
Përsa i përket luftës për mbijetesë, Starova theksoi se është “një tjetër kampionat brenda kampionatit”, ku çdo gabim mund të kushtojë rënien në një kategori më poshtë. Ai përmendi se të gjithë janë të motivuar dhe askush nuk është dorëzuar.
Në përfundim, Starova e përshkroi këtë fundsezon si ndër më emocionuesit e viteve të fundit, me të gjitha skenarët ende të hapur.
