Një bashkim kompanish ndërkombëtare dhe vendase ka fituar konkursin për rijetëzimin e stadiumit “Selman Stërmasi”, duke i hapur rrugë ndërtimit të një ambienti modern sportiv të shoqëruar me zhvillime të reja urbane. Projekti parashikon ndërtimin e një stadiumi të ri me standarde bashkëkohore, i cili do të përshtatet me kullat që do të ndërtohen në të njëjtin kompleks.
Bashkimi fitues i kompanive përfshin emra të njohur si OMA, RH DHV dhe LOLA Landscape Architects nga Holanda, së bashku me kompanitë shqiptare Albanian Investment Construction sh.p.k dhe Diagonal Projektim & Zbatim sh.p.k. Studioja holandeze OMA, e drejtuar dikur nga Rem Koolhaas, ka realizuar projekte madhore në të gjithë botën dhe besohet se do të sjellë një qasje inovative në këtë zhvillim. Ndërkohë, LOLA Landscape është e njohur për integrimin e natyrës në hapësira urbane, çka mund të përkthehet në një harmoni midis aktivitetit sportiv, banimit dhe gjelbërimit.
Në prapavijë të këtij zhvillimi qëndrojnë emrat Nikolin Jaka dhe Alban Peza, të cilët kanë mbështetur projektin si pjesë e një vizioni për transformimin urban të zonës së ish-stadiumit. Planet përfshijnë jo vetëm stadiumin, por edhe një kompleks kullash shumëfunksionale që do të përmbajnë hapësira për banim, zyra dhe shërbime të tjera.
Ky zhvillim ngre pikëpyetje mbi ndikimet e tij sociale dhe mjedisore, por nga ana tjetër shihet si një hap i rëndësishëm drejt modernizimit të infrastrukturës sportive dhe urbane të Tiranës. Projekti pritet të ndryshojë ndjeshëm siluetën e zonës dhe të krijojë një pol të ri zhvillimi në zemër të qytetit.
