Skënderbeu përballet me një nga sfidat më të rëndësishme të sezonit të tij, teksa pret në ndeshjen e fundit në shtëpi skuadrën e Bylisit. Ky takim nuk është veçse një duel i zakonshëm i kampionatit, por një përballje me fatet e sezonit për të dy ekipet. Korçarët ndodhen në një pozitë tepër delikate në renditje dhe vetëm një fitore ndaj rivalit të drejtpërdrejt, mund t’i mbajë gjallë shpresat për qëndrimin në elitën e futbollit shqiptar.
Atmosfera në Korçë është e ngarkuar, me tensionin që rritet ndërsa afron ora e ndeshjes. Drejtuesit e klubit kanë reaguar menjëherë duke bërë një njoftim të rëndësishëm për tifozët: hyrja në stadium do të jetë falas për të gjithë. Klubi Skënderbeu kërkon mbështetjen maksimale nga tifozeria lokale, duke e konsideruar këtë ndeshje si një “finale ekzistence”.
“Ne kemi nevojë për ju më shumë se kurrë,” thuhet në komunikatën zyrtare të klubit. “Së bashku mund të rikthejmë frymën luftarake që e ka dalluar gjithmonë Korçën dhe të mbajmë gjallë ëndrrën tonë në Superiore.”
Nga ana tjetër, Bylisi nuk vjen për të bërë figurë pranie. Edhe ata kanë nevojë për pikë për të siguruar qëndrimin, dhe kjo e bën takimin një betejë të vërtetë për mbijetesë. Trajnerët pritet të hedhin në fushë formacionet më të mira, ndërsa çdo moment i lojës pritet të jetë deciziv.
Është një 90-minutësh vendimtar, një sfidë që përtej pikëve, përfaqëson krenarinë e qytetit dhe përkushtimin ndaj fanellës. E gjithë Korça pritet të bashkohet për të qenë lojtari i dymbëdhjetë.
