Një ngjarje tragjike ka ndodhur në Greqi, ku një 33-vjeçar, Erjon Pelivani, humbi jetën padrejtësisht si pasojë e një manipulimi të rëndë nga mbesa e tij. Ngjarja e rëndë ndodhi më 9 janar 2024, pranë një fabrike çimentoje në Volos, ku Fatmir Tarellari, 51 vjeç, e qëlloi për vdekje kunatin e tij me pushkë gjahu.
Shkaku i vrasjes, siç rezulton nga hetimet dhe gjyqi që po zhvillohet në Gjykatën me Juri të Përzier të Larisës, ishte manipulimi emocional dhe teknologjik i kryer nga vajza 19-vjeçare e të pandehurit. Ajo kishte sajuar mesazhe të rreme në celular, duke i paraqitur si prova se viktima, daja i saj, e kishte përdhunuar kur ishte fëmijë. Vajza justifikoi mosshlyerjen e qirasë si pasojë e një shantazhi të supozuar nga daja i saj, duke i kërkuar paratë për të mos publikuar foto komprometuese.
Dëshmia tronditëse e saj gjatë seancës së fundit konfirmoi se ajo kishte falsifikuar mesazhet, të cilat në fakt ishin shkëmbime me të dashurin e saj. Ekspertiza e Policisë Helenike verifikoi manipulimin dhe rrëzoi themelet e akuzës fillestare.
Fatmir Tarellari, në një deklarim emocional gjatë gjyqit, shprehu pendesë të thellë, duke thënë: “Isha në gjendje shoku kur mësova çfarë supozohej se i kishte ndodhur vajzës sime.”
Rasti ka hapur diskutime të gjera në Greqi për pasojat fatale të dezinformimit dhe manipulimit me teknologjinë, si dhe për nevojën e mbështetjes psikologjike dhe hetimeve profesionale përpara marrjes së vendimeve të nxituara. Gjyqi po vazhdon dhe pritet të zbardhen të gjitha detajet e kësaj tragjedie me pasoja të pariparueshme.
