Pasuritë e paluajtshme, platformat mashtruese FOREX, call center-at dhe krijimi i shoqërive fiktive janë ndër metodat më të zakonshme që përdoren për pastrimin e parave në Shqipëri, sipas raportit më të fundit të Agjencisë së Inteligjencës Financiare (AIF). Në total, janë identifikuar 13 skema të ndryshme përmes të cilave individë apo grupe kriminale kanë tentuar të legalizojnë fitime të paligjshme.
Një nga metodat më të përdorura përfshin blerjen dhe shitjen e pasurive të paluajtshme me çmime të fryra apo në emër të palëve të treta, duke krijuar një pamje të rreme të burimit të ligjshëm të të ardhurave. Po ashtu, shoqëritë fiktive të regjistruara për qëllime formale ose me pronarë të paidentifikueshëm janë përdorur si fasadë për transaksione të dyshimta financiare.
Një tjetër skemë përfshin përdorimin e call center-ave të huaj për tregtimin mashtrues në platformat financiare si FOREX, ku investimet e qytetarëve kanalizohen në mënyrë të paautorizuar në llogari jashtë vendit. Kjo lejon kryerjen e transaksioneve ndërkombëtare duke shmangur kontrollin financiare vendas.
Ndër tipologjitë e tjera të listuara nga AIF përfshihen mashtrimet me karta bankare, përdorimi i strukturave offshore dhe transferimet ndërkombëtare me gjurmë të mjegullta. Të gjitha këto mekanizma kanë për qëllim final zhdukjen e origjinës kriminale të fondeve.
AIF ka referuar rastet me shkelje të dyshuara pranë institucioneve përkatëse, duke theksuar nevojën për forcim të mëtejshëm të kontrolleve dhe bashkëpunimit ndërinstitucional. Lufta kundër pastrimit të parave kërkon një qasje të koordinuar mes strukturave vendase dhe bashkëpunimit ndërkombëtar, për të goditur aktivitetet financiare të paligjshme dhe për të mbrojtur integritetin ekonomik të vendit.
