Pas vendimit të administratës amerikane për të vendosur një tarifë doganore prej 10 për qind për importet nga Kosova, bizneset eksportuese në vend po përballen me pasiguri të thella. Kompania Walone Fashion Group, e cila eksporton mbi 60 për qind të produkteve në SHBA – kryesisht fustane nusërie – është një nga më të prekura. Pronari i saj, Valon Osmani, thotë se aktualisht janë në pritje të reagimit të klientëve, ndërsa nuk përjashton mundësinë e rritjes së çmimeve.
Ekonomistët paralajmërojnë se kjo tarifë mund të ndikojë negativisht në të ardhurat, të rrisë koston e produkteve kosovare dhe të ulë konkurrencën e tyre në tregun amerikan. Në tre muajt e parë të këtij viti, eksportet kosovare në SHBA kapën vlerën prej 5.6 milionë eurosh, prej të cilave 3.2 milionë euro ishin nga sektori i veshmbathjeve – kategori ku bën pjesë edhe Walone.
Sipas Odës Ekonomike Amerikane në Kosovë, rritja e çmimeve do të dobësojë pozicionin e produkteve kosovare. Ndërkaq, organizatat ekonomike i kanë bërë thirrje Qeverisë së Kosovës që të ndërmarrë masa për të lehtësuar goditjen ndaj bizneseve, përfshirë mbështetje financiare dhe intensifikim të përpjekjeve diplomatike për pezullimin e tarifës.
Nga ana tjetër, presidentja Vjosa Osmani ka kërkuar nga Qeveria anulimin e tarifës që Kosova aplikon për produktet amerikane, si gjest reciprociteti. Një masë e tillë, sipas ekspertëve, mund të kontribuojë në një marrëdhënie më të favorshme tregtare me SHBA-në dhe në krijimin e kushteve për një marrëveshje të mundshme të tregtisë së lirë në të ardhmen.
