Ngjarja tragjike që ka tronditur komunitetin shqiptar në Itali ndodhi mbrëmjen e 28 prillit, kur një grua 27-vjeçare u gjet e pajetë dhe e lidhur në një pemë në zonën rurale të Montecilfone, në rajonin Molise. Viktima, me origjinë shqiptare por rezidente në Itali prej vitesh, u identifikua nga familjarët, ndërsa hetimet për rastin janë në duart e Prokurorisë Publike të Larinos dhe karabinierëve lokalë.
Pavarësisht rrethanave të dyshimta dhe faktit tronditës që trupi i saj ishte i lidhur, deri më tani nuk është vënë nën akuzë asnjë person. Prokuroria ka hapur një dosje hetimore dhe është në pritje të rezultateve të autopsisë, e cila do të zhvillohet të premten më 2 maj. Kjo procedurë pritet të japë të dhëna të rëndësishme mbi shkakun e saktë të vdekjes dhe kohën kur ndodhi ajo.
Sipas burimeve të para jozyrtare, ajo nuk kishte precedentë penale dhe kishte një jetë të qetë, megjithatë hetuesit janë të rezervuar për të dhënë detaje në këtë fazë. Hetimet po fokusohen gjithashtu në komunikimet e fundit të saj, të cilat mund të ofrojnë indicie mbi personat e fundit me të cilët ajo kishte kontakt.
Ndërkohë, komuniteti shqiptar në Montecilfone është në shok. Shoqata të ndryshme në mbështetje të emigrantëve kanë kërkuar zbardhjen e plotë të ngjarjes dhe drejtësi për 27-vjeçaren. Gjithashtu, ngjarja ka ngritur pikëpyetje mbi sigurinë e grave migrante dhe nevojën për politika mbrojtëse më të forta.
Në pritje të zhvillimeve të mëtejshme, autoritetet italiane theksojnë rëndësinë e ruajtjes së qetësisë dhe bashkëpunimit të publikut për ndihmë në hetim.
