Shqipëria do të hedhë një hap të rëndësishëm drejt integrimit europian të hënën më 24 qershor, kur në Luksemburg do të zhvillohet Konferenca e katërt ndërqeveritare Shqipëri-BE. Në këtë takim të nivelit të lartë do të hapet grupkapitulli i dytë i negociatave me Bashkimin Europian, që mbulon fushën kyçe të “Tregut të Brendshëm”.
Kryeministri Edi Rama do të kryesojë delegacionin shqiptar, i përbërë nga ministra, zëvendësministra dhe përfaqësues të ekipeve të negociimit për kapitujt përkatës. Kryeministri do të vizitojë fillimisht Brukselin, ku do të takohet me Presidentin e sapozgjedhur të Këshillit Europian, Antonio Costa, përpara se të udhëtojë drejt Luksemburgut për pjesëmarrje aktive në konferencë.
Gjatë hapjes së takimit, Rama do të mbajë fjalën zyrtare në emër të Shqipërisë, ndërsa nga ana e BE-së do të flasë Radosław Sikorski, Ministër i Punëve të Jashtme i Polonisë, vendi që mban Presidencën e radhës të Këshillit të BE. Në fund të punimeve, do të mbahet një konferencë e përbashkët shtypi mes Kryeministrit Rama, Komisioneres për Zgjerimin, Marta Kos, dhe ministrit Sikorski.
Grupkapitulli i II-të që do të hapet përfshin fusha thelbësore të funksionimit të tregut të brendshëm europian, si lëvizja e lirë e mallrave, punëtorëve, kapitalit dhe shërbimeve, legjislacioni për shoqëritë tregtare, të drejtat e pronësisë intelektuale, politika e konkurrencës, shërbimet financiare dhe mbrojtja e konsumatorit. Ky hap përfaqëson një përparim konkret në rrugën e anëtarësimit të plotë të Shqipërisë në Bashkimin Europian, duke konsoliduar reformat dhe harmonizimin me standardet europiane.
