Sipas raportit të pranverës nga Banka Botërore për rajonin e Europës dhe Azisë Qendrore (ECA), Shqipëria do t’i duhet një periudhë prej rreth 20 vitesh për t’u klasifikuar si vend me të ardhura të larta. Analiza përfshin 11 vende në zhvillim të rajonit, ndërsa për Shqipërinë theksohet nevoja për rritje të qëndrueshme ekonomike, përmirësim të produktivitetit dhe përfshirje më të thellë në tregjet ndërkombëtare.
Sipas të dhënave të fundit, të ardhurat për frymë në Shqipëri kanë arritur rreth 6,500 dollarë, ende larg pragut prej mbi 13,845 dollarësh që Banka Botërore e konsideron për vende me të ardhura të larta. Rritja e ngadaltë e produktivitetit, informalishteti i lartë në ekonomi dhe emigrimi i vazhdueshëm i fuqisë punëtore janë ndër sfidat kryesore që pengojnë zhvillimin më të shpejtë.
Raporti vlerëson se për të kapërcyer këtë hendek, Shqipëria duhet të përqendrohet në forcimin e institucioneve publike, rritjen e investimeve në sektorin privat dhe dixhitalizimin. Një tjetër rekomandim i rëndësishëm është përmirësimi i sistemit arsimor dhe lidhja më e mirë midis tregut të punës dhe arsimit profesional.
Pavarësisht këtyre sfidave, Banka Botërore përmend potencialin që Shqipëria ka, përfshirë pozitën gjeografike dhe burimet natyrore, si edhe përparimet e bëra në fusha të caktuara si turizmi dhe reforma fiskale. Megjithatë, theksohet se pa reforma të thella strukturore dhe një vizion afatgjatë për zhvillimin e qëndrueshëm, kalimi në kategorinë e vendeve me të ardhura të larta vazhdon të mbetet një objektiv afatgjatë, që kërkon përkushtim të vazhdueshëm dhe bashkëpunim mes sektorëve publik dhe privat.
