TIRANË – Sot, Shqipëria shënon 16 vjetorin e anëtarësimit të saj në Organizatatën e Traktatit të Atlantikut të Veriut (NATO), një moment historik që u përshëndet nga Presidenti i Republikës, Bajram Begaj. Në një deklaratë të shpërndarë në rrjetet sociale, Presidenti Begaj vlerësoi rolin aktiv dhe të qëndrueshëm të Shqipërisë në aleancën më të fuqishme të mbrojtjes kolektive në botë.
“Shqipëria feston sot me krenari 16 vjetorin e anëtarësimit në aleancën më të suksesshme të mbrojtjes kolektive, NATO,” u shpreh Kreu i Shtetit. Ai theksoi se gjatë këtyre viteve, vendi ynë ka treguar përkushtim të plotë dhe është dëshmuar si një anëtare e përgjegjshme dhe e denjë për këtë strukturë strategjike.
Që prej pranimit të saj në NATO më 1 prill 2009, Shqipëria ka marrë pjesë në një sërë misionesh ushtarake dhe kontribuar me trupa dhe mbështetje logjistike në operacionet e aleancës në Afganistan, Kosovë, Letoni dhe vende të tjera. Përfshirja në këto misione ka ndihmuar në forcimin e kapaciteteve ushtarake të Shqipërisë dhe në thellimin e bashkëpunimit me aleatët.
Presidenti Begaj ritheksoi se Shqipëria do të vijojë të jetë e përkushtuar ndaj vlerave euro-atlantike dhe pjesëmarrjes aktive në nismat e NATO-s, duke punuar për një aleancë të fuqishme, të bashkuar dhe solidare. “Shqipëria qëndron krah aleatëve të saj në përballimin e sfidave globale të sigurisë,” tha ai.
Ky përvjetor vjen në një kohë kur roli i NATO-s është bërë edhe më thelbësor përballë sfidave të reja në Evropë dhe më gjerë, duke e bërë angazhimin e vendeve anëtare si Shqipëria, kyç për stabilitetin ndërkombëtar.
