Mosmiratimi i Ligjit për fertilizimin e asistuar në Kosovë është cilësuar si një nga shkeljet kryesore të të drejtave të njeriut në raportin vjetor të Amnesty International për vitin 2023. Raporti vë në pah se qasja në fertilizim in vitro vazhdon të jetë e mundur vetëm në klinika private, pasi legjislacioni për shëndetin riprodhues nuk është miratuar nga Kuvendi. Kjo situatë pengon veçanërisht gratë beqare, të cilat u përballën edhe me gjuhë diskriminuese e stigmatizuese nga disa deputetë, të cilët kundërshtuan me pretendimin se po e mbronin “familjen tradicionale”.
Sipas Amnesty International, kjo qasje përjashtuese jo vetëm që cenon të drejtën për kujdes shëndetësor të barabartë, por nxit edhe diskriminimin gjinor dhe margjinalizimin e grave që nuk përputhen me normat e paragjykuara të familjes.
Një tjetër çështje e theksuar në raport është dështimi për miratimin e Kodit Civil, që mbahet pezull që nga viti 2022, kryesisht për shkak të debatit mbi njohjen e bashkësive civile ndërmjet personave të gjinisë së njëjtë. Amnesty evidenton mungesën e mbrojtjes së komunitetit LGBTI+, ku të mbijetuarit nga dhuna në familje ende nuk kanë qasje në strehimore të specializuara.
Raporti gjithashtu përmend dështimin e Kosovës për t’u anëtarësuar në Këshillin e Evropës, mungesën e progresit lidhur me ndjekjen e krimeve të luftës dhe zhvillime si shfuqizimi i Ligjit për Komisionin e Mediave dhe marrëveshja me Danimarkën për strehimin e të burgosurve.
Ky raport nënvizon nevojën urgjente që autoritetet kosovare të përmirësojnë mbrojtjen e të drejtave të njeriut dhe të adresojnë diskriminimin në baza gjinore dhe të identitetit.
