Përfaqësuesi i Lartë në Bosnje e Hercegovinë, Christian Schmidt, ka pezulluar financimin buxhetor për partinë Aleanca e Socialdemokratëve të Pavarur (SNSD), e udhëhequr nga Milorad Dodik, dhe për Srpska e Bashkuar – një partnere e koalicionit në Republika Srpska. Vendimi prek të gjitha nivelet e qeverisjes: shtetëror, entitativ dhe komunal.
Në një deklaratë nga Sarajeva, Schmidt theksoi se ky hap është reagim ndaj veprimeve që dëmtojnë Marrëveshjen e Dejtonit, duke paralajmëruar se financimi do të mbetet i pezulluar derisa të ndalen veprimet që rrezikojnë rendin kushtetues. Fondet e ndara për këto parti do të ridrejtohen në një llogari të veçantë pranë Bankës Qendrore të Bosnjës dhe Hercegovinës.
Schmidt, që përfaqëson bashkësinë ndërkombëtare në vend, ka kompetenca të gjera, përfshirë imponimin e ligjeve dhe shkarkimin e zyrtarëve, kompetenca që janë konfirmuar nga Gjykata Kushtetuese e BeH dhe Gjykata Evropiane për të Drejtat e Njeriut.
Ky veprim vjen në një kohë kur Milorad Dodik, Nenad Stevandiç dhe kryeministri i RS-së, Radovan Vishkoviç, janë nën hetim për tentativa të minimit të rendit kushtetues. Ata nuk janë paraqitur për marrje në pyetje, përkundër fletarresteve qendrore të lëshuara në mars 2024. Deri tanimë, asnjëra nga 16 agjencitë policore të vendit nuk ka ndërmarrë veprime konkrete për arrestimin e tyre.
Masa e re financiare është një sinjal i qartë nga komuniteti ndërkombëtar për papranueshmërinë e veprimeve që sfidojnë stabilitetin institucional të vendit dhe integritetin kushtetues të Bosnje e Hercegovinës.
