Përfaqësuesi i Lartë në Bosnje e Hercegovinë, Christian Schmidt, ka ndërmarrë një hap të pazakontë, duke pezulluar financimin buxhetor për Aleancën e Socialdemokratëve të Pavarur (SNSD), të udhëhequr nga Millorad Dodik, si dhe për partinë Sërpska e Bashkuar, partnere e saj në entitetin Republika Sërpska. Kjo masë ndëshkuese prek të gjitha nivelet e pushtetit, nga ai shtetëror e deri te komunat, dhe vjen si përgjigje ndaj veprimeve të cilësuara si minues të Marrëveshjes së Dejtonit.
Sipas Schmidt, fondet publike që deri tani u janë alokuar këtyre partive do të transferohen në një llogari të veçantë në Bankën Qendrore të BeH, derisa situata të ndryshojë. Ai theksoi se do ta rishqyrtojë vendimin vetëm nëse ndalet retorika dhe veprimet që rrezikojnë rendin kushtetues dhe kornizën ligjore të vendit.
Vendimi vjen në një kohë kur liderët e këtyre partive – përfshirë Dodikun, kryetarin e Kuvendit të Republika Sërpska, Nenad Stevandiç, dhe kryeministrin Radovan Viškovic – janë subjekt i një hetimi penal nga Prokuroria e Bosnjës për sulm ndaj rendit kushtetues. Ata nuk iu janë përgjigjur ftesave për marrje në pyetje, duke çuar në lëshimin e fletarrestimeve.
Christian Schmidt, i pajisur me kompetenca të gjera sipas Marrëveshjes së Dejtonit dhe vendimeve të gjykatave ndërkombëtare, ka ndryshuar gjithashtu Kodin Penal për të garantuar autoritetin e vendimeve të tij. Ky zhvillim shënon një përshkallëzim të tensioneve politike në Bosnje dhe pasqyron vendosmërinë e bashkësisë ndërkombëtare për të ruajtur integritetin territorial dhe rendin demokratik të vendit.
