Më 16 maj, Tirana pritet të bëhet epiqendra e politikës europiane, në një moment kyç për të ardhmen e kontinentit. Kryeministri Edi Rama, gjatë rubrikës së tij “Sy më Sy” në rrjetin social Facebook, deklaroi se kryeqyteti shqiptar do të presë liderë të rëndësishëm të Evropës, përfshirë edhe kancelarin e ri gjerman, në një samit që pritet të diskutojë tema të thella mbi sigurinë, zhvillimin ekonomik dhe përballimin e krizave të jetesës.
Ky takim vjen në një kohë kur Europa po përballet me sfida të shumta, duke e kthyer Shqipërinë në një pikë strategjike të dialogut dhe vendimmarrjes. Rama theksoi se ky është një moment historik për Shqipërinë, jo vetëm për rëndësinë politike, por edhe për promovimin ndërkombëtar turistik dhe kulturor që vjen përmes një platforme diplomatike të tillë. Ai vuri në dukje se ndërkohë që vendi po shkëlqen në sport, është koha për të forcuar imazhin edhe në skenën politike europiane.
Kryeministri shprehu bindjen se Shqipëria duhet të jetë pjesë e Bashkimit Europian, duke u shprehur optimist për procesin e integrimit. “Kjo Shqipëri duhet të hyjë në BE. Duhet të mbyllim përfundimisht hendekun me Europën,” tha ai, duke e përshkruar fazën aktuale si “100 metrat e fundit drejt finishit”.
Takimi i 16 majit shihet si një mundësi e artë për të afruar Shqipërinë më pranë familjes evropiane, duke përforcuar rolin e saj si kontribuese në stabilitetin dhe zhvillimin e rajonit.
