Shoqata “Roja e Kohës” organizoi sot një protestë paqësore në Prishtinë, pas disa ngjarjeve tragjike që tronditën vendin gjatë ditëve të fundit. Me pankarta në duar, dhjetëra qytetarë kërkuan masa të menjëhershme nga institucionet për të parandaluar përshkallëzimin e dhunës dhe rritjen e rasteve të vrasjeve në vend.
Ngjarjet e fundit në Vushtrri, Prishtinë dhe Kaçanik, përfshirë vrasjen e një rreshteri të Policisë së Kosovës, kanë rritur ndjeshëm ndjenjën e pasigurisë në mesin e qytetarëve. Kjo valë incidentesh të dhunshme ka bërë që opinioni publik të kërkojë veprime konkrete nga autoritetet kompetente.
“Vrasjet dhe dhuna po bëhen përditshmëri. Nëse institucionet nuk reagojnë, atëherë dhuna do të na gllabërojë,” deklaroi Shaip Tërnava, kryetar i “Roja e Kohës”. Ai kritikoi reagimin e ngadaltë institucional dhe kërkoi më shumë angazhim për parandalimin e armëmbajtjes pa leje dhe forcimin e ligjit.
“Kemi dalë në rrugë për të informuar dhe sensibilizuar qytetarët. Nuk mund të rrimë më të heshtur përballë vrasjeve,” shtoi Ajet Deliu nga e njëjta organizatë.
Qytetarët që morën pjesë në protestë përçuan mesazhe të qarta si “Çdo armë pa leje është krim” dhe “Për siguri nuk duam fjalë, duam veprim”, duke vënë theksin te nevoja urgjente për kontrolle të ashpra ndaj armëmbajtjes dhe forcimin e policisë komunitare.
Këto zhvillime ngrenë shqetësime serioze për sigurinë publike në Kosovë. Për qytetarët, rikthimi i besimit në institucionet e rendit mbetet kritik, ndërsa kërkohet më shumë transparencë, efikasitet dhe ndëshkueshmëri për krimin.
