Transformimi urban i Vlorës nuk ndalet, falë një sërë projektesh që po zhvillohen paralelisht në lagje, rrugë dhe sheshe të qytetit.
Hapësira ku shtrihet Bulevardi i Palmave dhe Agrumeve, në hyrje të Vlorës, po rigjenerohet për t’u shndërruar në një zonë moderne dhe funksionale. Ky projekt sjell një përmirësim të infrastrukturës, me rrugë të reja, pedonale për këmbësorët, vende parkimi, korsi biçikletash, fasada të rehabilituara dhe fusha sportive.
Kryeministri Edi Rama, i shoqëruar nga Kryetari i Bashkisë së Vlorës, Ermal Dredha, inspektoi punimet që po zhvillohen në këtë kantier. Drejtori i Fondit Shqiptar të Zhvillimit, Dritan Agolli, theksoi se projekti, përveç aspektit estetik, synon të përmirësojë cilësinë e jetës së banorëve dhe të rrisë vlerën e bizneseve lokale.
“Kjo ka qenë një zonë komplet e degraduar, ndërkohë që ishte një nga hyrjet kryesore të Vlorës. Tani po i rikthejmë jetën dhe po krijojmë një bulevard modern për qytetin,” – shprehet Agolli.
Kryeministri Rama, duke vlerësuar progresin e punimeve, sugjeroi disa përmirësime lidhur me mobilimin urban, duke theksuar rëndësinë e detajeve për ta bërë këtë hapësirë sa më funksionale dhe tërheqëse për qytetarët e Vlorës.
Projekti është konceptuar në tre segmentet kryesore: Bulevardi i Palmave, Bulevardi i Jacarandave dhe Bulevardi i Agrumeve, të cilët dallohen për llojet e gjelbërimit dhe elementet e dizajnit urban.
Një tjetër risi e projektit janë hapësirat rekreative, të menduara si kopshte të pasura me gjelbërim. Falë këtij investimi, pritet të ndryshojë tërësisht imazhi i hyrjes së qytetit të Vlorës dhe të rritet cilësia e jetesës së banorëve.
