Greqia ka nisur një reformë të thellë të forcave të saj të rezervës, duke synuar krijimin e një trupe prej 150,000 rezervistësh aktivë deri në vitin 2026, me fokus të veçantë në teknologjinë dhe luftën moderne. Ministri i Mbrojtjes Kombëtare, Nikos Dendias, prezantoi planin në Akademinë Ushtarake të Evelpidonit, duke theksuar rëndësinë që do të ketë përdorimi i dronëve në trajnimin e ri.
Në vitin 2024, më pak se 50% e rezervistëve iu përgjigjën thirrjes për stërvitje, çka e nxiti Ministrinë të ndërmarrë masa për të rritur efektivitetin. Reforma do të bazohet në pjesëmarrje vullnetare, me përjashtime për disa specialitete ushtarake kritike. Rezervistët do të angazhohen në cikle trajnimi të rregullta dhe intensive, çdo 3-5 vjet, duke akumuluar deri në 80 ditë ushtrim për ushtarët dhe 150 ditë për oficerët gjatë gjithë shërbimit.
Programi i ri i trajnimit do të përfshijë taktika moderne luftarake, përdorimin e dronëve dhe simulime teknologjike të nivelit të lartë, duke marrë shembull nga modelet e Finlandës dhe Izraelit. Dy Qendra të Reja Ri-stërvitjeje të Rezervistëve do të ngrihen në pika strategjike të vendit, për të garantuar një shtrirje sa më të gjerë të projektit.
Për të nxitur pjesëmarrjen, parashikohet kompensim financiar për rezervistët, në mënyrë që angazhimi i tyre në ushtri të mos ndikojë negativisht në karrierën civile. Kjo iniciativë është pjesë e “Agjendës 2030” dhe reflekton synimin e Greqisë për të përgatitur një forcë elastike dhe moderne, në përgjigje të sfidave të reja gjeopolitike në rajon.
/abcnews.al
