Kryeministri Edi Rama ka theksuar rëndësinë e votës për Partinë Socialiste lidhur me objektivin e anëtarësimit të Shqipërisë në Bashkimin Europian. Gjatë një takimi në Lezhë me të rinj dhe kandidatët e PS, ai u shpreh se me drejtimin e tij, integrimi do të ndodhë shumë shpejt, ndërsa me Sali Berishën, i cili ka statusin “non grata”, procesi do të jetë i paralizuar.
**”Pa hyrë në çështjet e bufit, që e ka damkën në lule të ballit, nuk e di se si mund ta imagjinojë dikush që ai do të ketë të hapura dyert e komunikimit siç i kemi ne me PS,”** – theksoi Rama. Ai argumentoi se vota për Partinë Socialiste është një hap i sigurt drejt negociatave në vitin 2027 dhe anëtarësimit në BE.
Rama iu drejtua edhe mbështetësve të opozitës, duke theksuar se Berisha nuk mund të vijë më në pushtet dhe se lista e tij është e destinuar për opozitë. **”Këneta nuk vjen dot në pushtet pa u tharë,”** – shtoi ai, duke përdorur një metaforë për të përshkruar situatën politike të kundërshtarëve.
Ndër të tjera, ai bëri një krahasim mes Lulzim Bashës dhe Berishës, duke argumentuar se rezultati elektoral i Bashës në vitin 2021 ishte “maja” e arritjeve të opozitës aktuale. **”Luli është më i miri nga këta,”** – tha Rama, nënkuptuar se fraksioni aktual opozitar është më i dobët.
Ironia nuk mungoi as për të rinjtë e politikës, ku ai përmendi raste të caktuara, si djali i Fahri Balliut, duke ngritur pikëpyetje mbi seriozitetin e disa figurave të reja politike.
Me këtë mesazh, Kryeministri po synon të përçojë idenë se vetëm PS garanton një të ardhme të sigurt europiane për Shqipërinë.
