Zemërimi i studentëve serbë pas tragjedisë së ndodhur në Novi Sad nuk po zbehet, por përkundrazi, po intensifikohet. Prej më shumë se 24 orësh, dhjetëra studentë kanë rrethuar ndërtesën e Radio Televizionit Publik të Serbisë (RTS) në Beograd, duke kërkuar dorëheqjen e drejtuesit Goran Karaxhiq. Sipas tyre, ky institucion nuk ka reflektuar zërin e qytetarëve dhe ka dështuar në raportimin objektiv të ngjarjeve, pavarësisht se financohet nga taksat publike. Ata kërkojnë që RTS të sqarojë nëse mbron interesat shtetërore apo të qytetarëve.
Protestat nuk kufizohen vetëm në Beograd. Në Kraljevë, studentët kanë bllokuar lëvizjen në katër kryqëzime kryesore, në një aksion simbolik që pritet të zgjasë deri në mesnatë, i quajtur “Pompo, pompo ujin e Ibrit”.
Një grup tjetër studentësh ka ndërmarrë një rrugëtim të jashtëzakonshëm – 1300 kilometra me biçikleta drejt Strasburgut – për të ngritur zërin kundër korrupsionit dhe shkeljeve të lirive demokratike në Serbi. Ata mbërritën më 15 prill pas një udhëtimi përmes Hungarisë, Sllovakisë, Austrisë e Gjermanisë.
Në ceremonitë përkujtimore në Beograd, Kraljevë dhe Strasburg, u mbajtën 16 minuta heshtje në nder të viktimave të shembjes tragjike në stacionin hekurudhor në Novi Sad, më 1 nëntor 2023.
Duke i drejtuar një letër Këshillit të Europës dhe Presidentit Macron, studentët theksuan se nuk kanë ardhur për të ikur nga vendi i tyre, por për ta bërë Serbinë si Europa – një vend ku të drejtat e njeriut dhe dinjiteti respektohen. Protestat që prej nëntorit kanë përfshirë mijëra qytetarë, ndërsa qeveria akuzon aktorë të jashtëm për destabilizim. Sidoqoftë, studentët mbeten të palëkundur në kërkesat e tyre për transparencë dhe drejtësi.
