Më 14 prill, Gjuro Macut, mandatar për formimin e Qeverisë së Serbisë, i ka dorëzuar Kuvendit serb propozimin për përbërjen e kabinetit të ri qeverisës, bashkë me biografitë përkatëse të anëtarëve të propozuar. Të nesërmen, më 15 prill, Kuvendi do të mblidhet në një seancë të jashtëzakonshme të thirrur nga kryetarja Ana Bërnabiç për të votuar për qeverinë e re.
Në kabinetin e propozuar ruajnë pozitat e tyre ministrat kyç të qeverisë së mëparshme si Sinisha Malli në detyrën e zëvendëskryeministrit të parë dhe ministër i Financave, Ivica Daçiq në Ministrinë e Punëve të Brendshme dhe Adrijana Mesaroviç si ministre e Ekonomisë. Në pozita të rëndësishme mbeten edhe Bratislav Gashiç (Mbrojtja), Marko Gjuriç (Punët e Jashtme), Zllatibor Lonçar (Shëndetësia) dhe Nikolla Sellakoviç (Kultura).
Risi të propozuara përfshijnë Dejan Vuk Stankoviçin si ministër i Arsimit dhe Nemanja Staroviç, tashmë i ngarkuar me çështjet e Integrimeve Evropiane. Millica Gjurgjeviq Stamenkoviq kalon në resorin e Çështjeve Sociale. Dragan Glamoçiq propozohet të udhëheqë Ministrinë e Bujqësisë dhe Sara Pavkov të jetë ministre për Mbrojtjen e Mjedisit.
Presidenti Aleksandar Vuçiç i besoi më 6 prill Macutit mandatin, pas dorëheqjes së Millosh Vuçeviq më 19 mars, në një klimë të tensionuar politike pas protestave studentore dhe rënies së qeverisë së mëparshme mes kërkesave për përgjegjësi për tragjedinë në Novi Sad.
Pavarësisht kërkesës së opozitës për një qeveri kalimtare, koalicioni në pushtet ka refuzuar skenarin, duke avancuar për krijimin e një ekzekutivi të ri në përputhje me procedurat institucionale.
