Dy katalogje të publikuara nga Agjencia e Administrimit të Pronave të Sekuestruara dhe Konfiskuara (APSK) kanë tërhequr së fundmi vëmendjen e publikut përmes vizualizimeve të rafinuara dhe fotove me ngjyra të pasurive të sekuestruara apo të konfiskuara nga shteti shqiptar. Këto katalogje përmbajnë qindra prona, nga vila, apartamente luksoze, toka bujqësore e deri te biznese aktive, të cilat janë pjesë e një procesi të gjerë të antikorrupsionit dhe luftës kundër krimit të organizuar.
Megjithatë, pas pjesës estetike fshihet një realitet i hidhur: Agjencia ka dështuar të përmbushë objektivin themelor për të cilin është krijuar – riintegrimin dhe valorizimin e këtyre pronave në favor të shtetit dhe qytetarëve. Shumica dërrmuese e pasurive vazhdojnë të rrinë jashtë funksionit, shumë prej tyre në kushte të amortizuara, të pambrojtura nga vandalizmi apo zaptimet e paligjshme. Mungesa e një strategjie të qartë për menaxhimin aktiv, nxjerrjen në ankand apo shfrytëzimin për dobi publike, po i kthen këto prona në barrë për administratën shtetërore, në vend të një asset-i me vlerë ekonomike.
Në vend që të ofrojë transparencë dhe rezultate konkrete, APSK duket se po mbulon mungesat institucionale me një fasadë tërheqëse – katalogë me dizajn modern dhe përshkrime komerciale, por pa një krik të vërtetë funksional. Këto botime shërbejnë më shumë si një alibi publike sesa si një instrument eficent i drejtësisë kundër pasurive të përfituara në mënyrë të paligjshme.
Në një kohë kur qytetarët kërkojnë përgjegjshmëri dhe eficencë nga institucionet, ekspozimi estetik i këtij dështimi përmes fotove me ngjyra është një zhgënjim i shtuar në një sistem që ende lufton me transparencën dhe drejtësinë reale.
