Athinë – Gjatë një takimi me komunitetin shqiptar në Greqi, kryeministri Edi Rama theksoi rëndësinë historike të afrimit mes Shqipërisë dhe Greqisë, duke e quajtur “absurditet” ekzistencën e ligjit të luftës midis dy vendeve. Rama shprehu bindjen se marrëdhëniet dypalëshe po hyjnë në një etapë të re, atë të partneritetit strategjik, që do të përfshijë bashkëpunimin në fusha të shumta, nga arsimi tek drejtësia.
Kryeministri theksoi se heqja e ligjit të vjetër të luftës është një hap i domosdoshëm për ndërtimin e një klime të re besimi e bashkëpunimi me Greqinë. duke shtuar se kësaj i ndihmon edhe avancimi i reformave të brendshme në Shqipëri. Rama vlerësoi gjithashtu rolin e emigrantëve shqiptarë si ambasadorë të vërtetë të vendit dhe bëri thirrje për pjesëmarrje masive në votime më 11 maj, për të mbështetur Partinë Socialiste dhe procesin e integrimit europian.
Ai nënvizoi gjithashtu rolin e reformës në drejtësi dhe mbështetjen që PS i ka dhënë SPAK-ut, duke theksuar se “shpata e drejtësisë” është një instrument kyç për shtetin ligjor. Përmes një vizioni të ri për ruajtjen e identitetit kulturor, Rama njoftoi nisjen e një platforme dixhitale për të mësuar gjuhën shqipe, dedikuar fëmijëve të emigrantëve. Aplikacioni, i zhvilluar në bashkëpunim me të rinj të talentuar në fushën e teknologjisë, synon të forcojë lidhjet me atdheun dhe arsimin kulturor të brezave të rinj.
Kjo qasje e re dëshmon përkushtimin e qeverisë shqiptare për një bashkëpunim të qëndrueshëm me Greqinë dhe për fuqizimin e diasporës si pjesë integrale e zhvillimit kombëtar.
/abcnews.al/
