Prej dy ditësh, Partizani ka nisur përgatitjet intensive në prag të sfidës së dytë gjysmëfinale të Kupës së Shqipërisë. Pas fitores minimale 1-0 në ndeshjen e parë kundër Egnatias në Rrogozhinë, të kuqtë po analizojnë çdo detaj për të siguruar kalimin në finalen e madhe. Në një sezon ku gara për titullin është bërë shumë e vështirë dhe kualifikimi në “Final Four” është në rrezik, Kupa shihet si mundësia më reale për sukses.
Një lajm pozitiv për trajnerin Zoran Zekiç ka ardhur nga reparti i sulmit. Rikuperimi i sulmuesit kryesor i jep një tjetër frymëmarrje ekipit, pasi mungesa e alternativave efektive në zonën ofensive ka qenë një nga problematikat kryesore të javëve të fundit. Rikthimi i tij jo vetëm rrit konkurrencën në skuadër, por mund të jetë vendimtar për fatin e ndeshjes kthim.
Nga ana tjetër, dhimbje koke për staf teknik sjell gjendja e mbrojtësit të krahut, Klejdi Buxhelaj, i cili rrezikon seriozisht të mungojë për shkak të një dëmtimi muskulor. Ai është një nga lojtarët më të qëndrueshëm në formacionin e të kuqve dhe mungesa e tij do t’i detyrojë drejtuesit të eksperimentojnë në mbrojtje, në një ndeshje ku vëmendja taktike është kyçe.
Skuadra po stërvitet me intensitet të lartë në kompleksin e Kamzës, me fokusin total te organizimi mbrojtës dhe tranzicioni i shpejtë në sulm. Me moralin e ngritur, por me sfida të dukshme në formacion, Partizani hyn në një javë vendimtare për të sezonin, ku gabimet nuk falen dhe gjithçka vendoset në detaje.
