Bandat shqiptare që operojnë në Mbretërinë e Bashkuar po përdorin metoda gjithnjë e më të sofistikuara për të transferuar paratë e përfituara nga trafiku i drogës drejt Shqipërisë. Sipas një artikulli të publikuar së fundmi nga Daily Mail, këto grupe kriminale rekrutojnë individë si “turistë të rremë” për të kaluar kufirin me sasi të mëdha parash të padeklaruara, duke shmangur kështu sistemin bankar dhe kontrollin financiar të autoriteteve.
Strategjia përfshin përdorimin e rrjeteve të strukturuara ku persona që paraqiten si udhëtarë të zakonshëm transportojnë qindra mijëra paund cash drejt Shqipërisë. Këto para më pas investohen në prona luksoze, makina të shtrenjta dhe aktivitete të tjera që shërbejnë si mjete për pastrimin e parave.
Në fund të vitit 2023, autoritetet në Shqipëri dhe Britani evidentuan një rritje të ndjeshme të rasteve të individëve të kapur me shuma të mëdha parash në kufi, duke e konsideruar këtë fenomen si një problem serioz transnacional. Rreth 1,100 raste të tilla u dokumentuan në një periudhë të shkurtër, duke nxitur bashkëpunimin mes SPAK dhe Agjencisë Kombëtare të Krimit në Britani (NCA).
SPAK dhe NCA tashmë kanë në shënjestër këto rrjete kriminale ndërkombëtare, duke ndjekur linjat e transferimit të parave dhe burimet reale të të ardhurave. Zyrtarët theksojnë se lufta kundër këtij fenomeni kërkon kontrolle më të rrepta, bashkëpunim të ngushtë ndërkombëtar dhe ndëshkime të rënda për të gjithë ata që kontribuojnë në ruajtjen e këtij sistemi ilegal.
Rritja e investimeve të pajustifikuara në Shqipëri po alarmon gjithnjë e më shumë autoritetet ndërkombëtare, të cilat e shohin fenomenin si një kërcënim serioz për stabilitetin ekonomik dhe rendin publik në të dy vendet.
