Prokuroria Themelore në Ferizaj ka paraqitur kërkesë për caktimin e masës së paraburgimit për një muaj ndaj gjashtë personave të arrestuar për përfshirjen e tyre të dyshuar në vrasjen e rreshterit të Policisë së Kosovës, Muhamed Lika. Vrasja ndodhi më 1 prill në Kaçanik, teksa Lika po kthehej në banesë nga puna dhe u qëllua nga prapa, dyshohet nga një i mitur, në bashkëkryerje me pesë persona të tjerë.
Të dyshuarit janë identifikuar nga prokuroria me inicialet H.B., R.M., V.Ç., E.L., Sh.K. dhe D.G., të gjithë banorë të Kaçanikut. Gjatë një operacioni të gjerë më 8 prill, policia organizoi bastisje në nëntë lokacione në Kaçanik dhe një tjetër në një fshat të Klinës, duke sekuestruar disa prova materiale, përfshirë telefona mobilë, laptopë, dy automjete, armë zyrtare, maska, tyta armesh dhe fishekë.
Drejtori i Policisë së Kosovës, Gazmend Hoxha, si dhe kryeprokurori Burim Çerkini, deklaruan në konferencë për media se pista kryesore hetimore lidhet me aktivitetin profesional të viktimës. “Dyshimet tona janë se rreshteri Lika u vra për shkak të angazhimit të tij zyrtar në zgjidhjen e rasteve kriminale”, tha Hoxha.
Gjithashtu, u bë e ditur se disa nga të arrestuarit kanë precedentë penal dhe dyshohen për lidhje me veprime ekstremiste. Hetimet po vazhdojnë me intensitet për të zbardhur rrethanat dhe motivet e plota të këtij akti të rëndë, ndërkohë që autoritetet kanë theksuar përkushtimin për ndriçimin e rastit dhe vendosjen e drejtësisë.
