Deklaratat e fundit të presidentes Vjosa Osmani kanë rikthyer në vëmendje tensionet mes Presidencës dhe Qeverisë Kurti, në një moment kyç për politikën e brendshme dhe të jashtme të Kosovës. Duke folur për Klan Kosova, Osmani ka denoncuar si “turp të madh” faktin që Kosova mban ende tarifa 10% ndaj Shteteve të Bashkuara të Amerikës, ndërkohë që kanë zero tarifa ndaj Serbisë.
“Kjo nuk është çështje fiskale, por çështje e aleancave strategjike. Po flasim për SHBA-të, aleatin tonë ekzistencial”, theksoi Osmani, duke nënvizuar pafalshmërinë e kursit të qeverisë Kurti ndaj partnerëve perëndimorë, sidomos në kohën kur marrëdhëniet me Beogradin po tregojnë shenja afrimi.
Mesazhi i saj u shoqërua me kritika të ashpra për mënyrën se si është trajtuar komunikimi institucional. Ajo sqaroi se komunikimi me Kurtin ka ndodhur përmes letrave zyrtare, duke hedhur poshtë akuzat e ish-ministrit të Financave, Hekuran Murati, i cili pretendoi se kontaktet ishin bërë me email.
Në sfondin e këtyre përplasjeve, mbetet e paqartë pse Qeveria heziton të heqë tarifat ndaj SHBA-së, ndërkohë që Serbia nuk përballet me asnjë pengesë tarifore ekonomikisht. Sipas Osmanit, një qasje e tillë dëmton jo thjesht marrëdhëniet dypalëshe me Washingtonin, por minon kredibilitetin ndërkombëtar të Kosovës në tërësi.
Presidentja ka përcjellë mesazhin se veprimet e saj janë në funksion të interesit kombëtar dhe orientimit euroatlantik të vendit. Deklarata e saj është një thirrje për reflektim dhe rivendosje të prioriteteve strategjike në politikën e jashtme të Kosovës.
