Fushata elektorale për zgjedhjet në Shqipëri ka hyrë në një fazë të re, ku Partia Demokratike po kërkon të forcojë pozitat ndërkombëtare përmes mbështetjes nga figura të rëndësishme nga rrethi i ish-presidentit amerikan Donald Trump. Kjo qasje synon të rrisë legjitimitetin e saj në arenën ndërkombëtare dhe të dërgojë një mesazh politikës vendase e ndërkombëtare se PD ka aleatë të fuqishëm në SHBA, pavarësisht dallimeve ideologjike midis administratave.
Sipas raportimeve nga “BoldNews.al”, disa ish-zyrtarë të administratës Trump, si Corey Lewandowski—një ish-këshilltar dhe drejtues i fushatës së Trump në vitin 2016—ashtu dhe personalitete të lidhur me think-tank-e konservatore, janë angazhuar për të ndihmuar PD-në jo vetëm në aspektin e strategjisë elektorale, por edhe në ndërtimin e urave me autoritete ndërkombëtare.
Kjo përpjekje vjen në një moment kur kryeministri Edi Rama ka ndryshuar qasjen e tij ndaj çështjes së politikanëve “Non Grata”, veçanërisht në raport me SHBA. Dikur ai deklaronte prerazi se nuk pranonte asnjë bashkëpunim me të sanksionuar nga SHBA, por tani kjo narrativë është zëvendësuar me fabula ironike si ajo e “bufit të kënetës”, duke shmangur thelbin e çështjes.
Ndërkohë, rilindasit ndërtojnë një diskurs të ri, ku bashkëpunimi me elementë të sanksionuar nuk përbën më tabu. Kjo duket se ka krijuar hapësirë për PD-në që të legjitimojë aleancat e veta ndërkombëtare, edhe pse rrjedhin nga kampi republikan, shpesh herë kundërshtar i linjës Biden.
Në këtë kontekst, mbështetja nga njerëzit e Trump po shihet si një burim fuqie për PD-në në një fushë politike gjithnjë e më polarizuese.
