Tregjet financiare europiane janë tronditur ndjeshëm pas vendimit të fundit të Kinës për të aplikuar një tarifë hakmarrëse prej 34% ndaj një game të gjerë mallrash të importuara nga Shtetet e Bashkuara. Ky zhvillim vjen si reagim ndaj tarifave të reja të shpallura nga administrata e presidentit Donald Trump, të cilat synojnë të kufizojnë importet kineze dhe të rrisin presionin ekonomik ndaj Pekinit. Situata ka përshkallëzuar më tej tensionet tregtare globale, që tashmë po reflektohen negativisht në tregjet kryesore të bursës në Evropë.
Bursa e Milanos ka qenë një prej më të goditurave, duke shënuar një rënie të mprehtë prej 7%. Humbjet më të mëdha kanë qenë në sektorin bankar dhe atë të sigurimeve, të cilët janë veçanërisht të ndjeshëm ndaj paqëndrueshmërisë globale. Gjithashtu, tregjet e Parisit dhe Frankfurtit kanë pësuar ulje përkatëse prej 5.3% dhe 4.7%, duke reflektuar shqetësimet rreth një ngadalësimi të mundshëm ekonomik në eurozonë.
Analistët nënvizojnë se investitorët janë të shqetësuar për efekte zinxhir në eksporte dhe industri, pasi tarifat e reja mund të ndikojnë jo vetëm në SHBA dhe Kinë, por edhe në kompanitë europiane që operojnë në të dy tregjet. Prania e ndërlidhjeve të forta midis zinxhirëve të furnizimit global e bën Evropën veçanërisht të prekshme ndaj tensioneve tregtare ndërkombëtare.
Pekin ka ngritur gjithashtu një padi në Organizatën Botërore të Tregtisë kundër SHBA-së, duke e thelluar konfliktin. Në kushtet aktuale, tregjet globale mbeten nën presion, me rritje të pasigurisë për investitorët dhe biznese që varen nga stabiliteti i marrëdhënieve ndërkombëtare ekonomike.
