Në Velipojë, situata me ndërtimet pa leje ka arritur përmasa alarmante, ndërsa autoritetet përgjegjëse, në vend që të marrin masa konkrete, ia hedhin përgjegjësinë njëra-tjetrës. IKMT dhe Bashkia Shkodër duket se janë më të zëna duke justifikuar dështimet, sesa duke frenuar këtë fenomen që po dëmton rëndë bregdetin dhe natyrën.
Siç ndodh tradicionalisht në prag të fushatave elektorale, kur institucionet fokusohen tek mobilizimi për vota, monitorimi i territorit duket se zbehet ndjeshëm. Në këtë vakuum kontrolli, ndërhyrjet pa leje shtohen, duke sjellë një panoramë ndërtimesh të papërgjegjshme. Gjithsesi, situata në Velipojë këto muaj ka kaluar çdo pritshmëri, me ndërtues që punojnë pa u ndalur edhe natën, për të përfituar nga mungesa e vëmendjes institucionale.
Edhe pse ka pasur denoncime të përsëritura nga qytetarë dhe media, strukturat shtetërore kanë bërë vetëm një sërë inspektimesh sporadike, ku më shumë se ndëshkimi, ka dominuar toleranca. Për më tepër, në deklaratat publike, IKMT dhe Bashkia Shkodër këmbëngulin në fajësimin e ndërsjellë, duke shmangur çdo përgjegjësi konkrete për veprim apo mosveprim.
Nga njëra anë, Bashkia pretendon se nuk ka kompetenca të plota për të ndërhyrë në ndërtime pa leje, ndërsa nga ana tjetër, IKMT-së i mungojnë burimet dhe mbështetja e duhur për të qenë efektive. Kjo lojë e “pasimit të topit” vetëm sa rrit mosbesimin e qytetarëve ndaj institucioneve dhe lë hapësira të mëdha për spekullim dhe abuzim.
Sidoqoftë, nëse nuk ndërmerren masa të menjëhershme dhe gjithëpërfshirëse, rreziku është që Velipoja të degradojë edhe më shumë, duke humbur një nga asetet më të çmuara turistike të veriut të Shqipërisë.
