Ndeshjet pasojnë njëra-tjetrën për Vllazninë dhe fjala “pushim” nuk ekziston për momentin në kampin shkodran. Vetëm një ditë pas barazimit 0-0 ndaj Teutës në “Loro Boriçi”, lojtarët janë rikthyer në fushën stërvitore të hënën për të nisur përgatitjet për përballjen e parë gjysmëfinale të Kupës së Shqipërisë kundër Dinamos, që zhvillohet të mërkurën.
Trajneri Thomas Brdariç ndodhet nën presion të madh, jo vetëm për shkak të rëndësisë së këtij takimi në garën për trofe, por edhe përmes mungesave të rëndësishme që e detyrojnë të ndryshojë planet taktike të ndeshjes. Kapiteni Erdenis Gurishta është jashtë për shkak pezullimi pas grumbullimit të kartonëve, ndërsa dy titullarë të tjerë që kanë qenë shumë të rëndësishëm këtë sezon, Ardit Krymi dhe Silvio Zogaj, po vuajnë dëmtime muskulore dhe janë të dyshimtë për të qenë gati.
Këto mungesa e vendosin Brdariç në një situatë të vështirë. Alternativat në stol nuk janë në të njëjtin nivel për të zëvendësuar cilësinë dhe përvojën e Gurishtës apo rolit kyç që kanë Krymi dhe Zogaj në mesfushë. Për më tepër, aspekte të rëndësishme si balanca mbrojtëse dhe shpërndarja e topit mund të ndikohen ndjeshëm.
Përballë Dinamos, një skuadër që ka treguar rritje në formë, çdo detaj do të jetë thelbësor. Vllaznia do të kërkojë të përfitojë nga faktori fushë, por për ta realizuar këtë, Brdariç dhe stafi duhet të gjejnë zgjidhje kreative dhe efikase për të mbuluar boshllëqet në formacion. Duket se një tjetër provë karakteri e pret skuadrën kuqeblu në rrugën për në finalen e Kupës.
