Ministrja gjermane për Evropën dhe Klimën, Anna Luhrmann, ka deklaruar se ajo dhe delegacioni i saj janë kërcënuar me dhunë gjatë një vizite në Banjallukë, nga përfaqësues të presidentit të Republikës Srpska, Millorad Dodik. Vizita e saj ndodhi të premten, në qytetin më të madh të entitetit serb të Bosnje e Hercegovinës, ku ajo u takua me përfaqësues të shoqërisë civile dhe opozitën lokale.
Përmes një postimi në platformën X (ish-Twitter), Luhrmann e përshkroi qytetin si “të mrekullueshëm, me njerëz të mirë” dhe theksoi mikpritjen që kishte përjetuar nga banorët. Por në përfundim të vizitës, situata mori një kthesë të tensionuar. Sipas saj, përfaqësuesit e Dodikut i kërcënuan ata me dhunë, duke theksuar se kjo sjellje është shenjë e dobësisë dhe izolimit politik të udhëheqësit të Republika Srpskës.
Në të njëjtën ditë, Qeveria e Republikës Srpska e shpalli Luhrmann persona non grata, duke e ndaluar hyrjen e saj në këtë territor në të ardhmen. Këto veprime pasqyrojnë një përkeqësim të mëtejshëm të marrëdhënieve mes udhëheqjes së këtij entiteti dhe përfaqësuesve të BE-së, veçanërisht ndaj atyre që kritikojnë përpjekjet për shkëputje nga Bosnja dhe Hercegovina.
Luhrmann dënoi qasjen e Dodikut si të papranueshme dhe tha se planet për shkëputje janë në kundërshtim me Marrëveshjen e Paqes së Dejtonit dhe rrugën evropiane të vendit. Reagimi i saj është përshëndetur nga akterë ndërkombëtarë që e shohin mbështetjen ndaj shoqërisë civile si një element kyç për stabilitetin rajonal.
Incidenti nënvizon tensionet politike në rritje dhe rrezikun e izolimit të mëtejshëm të Republikës Srpska në arenën ndërkombëtare.
