Henrikh Mkhitaryan, mesfushori armen i Interit, në një intervistë për portalin Fast Sport, ka ndarë disa reflektime mbi rrugëtimin dhe eksperiencën e tij aktuale në Milano. Ai theksoi se pas një karriere të pasur me transferta dhe sfida në kampionate të ndryshme, tani ndihet i lumtur dhe i stabilizuar te zikaltrit.
“Kam qenë në disa vende. Kam pasur momente të vështira në jetën time. Tani jam i lumtur që jam këtu,” tha Mkhitaryan, duke reflektuar mbi përvojat që e kanë formuar si lojtar dhe njeri. E ardhja e tij në Inter në moshën 33-vjeçare dhe vazhdimi i suksesshëm deri në moshën 36-vjeçare janë dëshmi e profesionalizmit dhe përkushtimit të tij ndaj futbollit elitar.
Një pjesë kyçe e suksesit të tij te Interi, sipas Mkhitaryan, është edhe ndikimi i trajnerit Simone Inzaghi. “Inzaghi është një trajner jashtëzakonisht inteligjent,” u shpreh ai. “Ai di të menaxhojë skuadrën, di të bëjë zgjedhjet e duhura në momentet e duhura dhe na motivon gjithmonë të japim maksimumin.”
Nën drejtimin e Inzaghit, Interi ka ndërtuar një identitet të fortë dhe elastik duke u bërë një nga skuadrat më të frikshme në Itali dhe Evropë. Mkhitaryan është shndërruar në një element kyç në mesfushë me përvojën dhe vizionin e tij, duke kontribuar jo vetëm në aspektin teknik, por edhe në drejtimin e skuadrës në fushë.
Për Mkhitaryan, aventura tek Interi është jo thjesht një vazhdim i karrierës, por një kapitull i ri i mbushur me gëzim, suksese dhe sfida të reja.
