Sekretari i Përgjithshëm i NATO-s, Mark Rutte, gjatë fjalës së tij në Samitin dyditor në Bruksel, theksoi vendosmërinë e Aleancës për të ruajtur paqen dhe stabilitetin në Ballkanin Perëndimor. Ai u shpreh se rajoni mbetet një prioritet strategjik për NATO-n dhe se aleatët janë të përqendruar në mbështetjen e partnerëve të Ballkanit në rrugën e tyre drejt reformave demokratike dhe integrimit euroatlantik.
“Është një nga çështjet që jemi fokusuar të gjithë,” tha Rutte. “Siç edhe e dini, unë kam qenë në Sarajevë dhe në Prishtinë, ku kam parë nga afër sfidat dhe përkushtimin e popujve për një të ardhme më të qëndrueshme.” Ai përforcoi mesazhin se stabiliteti i rajonit lidhet ngushtësisht me sigurinë e vetë Evropës.
Në një kohë kur ndikimet e jashtme dhe tensionet etnike kërcënojnë stabilitetin e Ballkanit, Rutte ritheksoi rolin vital të NATO-s në parandalimin e konflikteve dhe në ruajtjen e rendit demokratik. Ai vlerësoi bashkëpunimin me forcat paqeruajtëse në Kosovë (KFOR), si dhe me institucionet vendore dhe rajonale.
Gjithashtu, sekretari i përgjithshëm kërkoi përkushtim të shtuar nga vendet e Ballkanit për të avancuar reformat, duke përfshirë sundimin e ligjit, respektimin e të drejtave të njeriut dhe ndërtimin e institucioneve të forta.
Fjalimi i Rutte u mirëprit nga udhëheqësit e vendeve anëtare, duke reflektuar qartësisht përkushtimin kolektiv për një Ballkan perëndimor të sigurt, të pajtueshëm dhe të lidhur me strukturat euroatlantike. Mesazhi i tij theksoi se NATO nuk është thjesht një aleancë ushtarake, por një partner strategjik për paqen afatgjatë në rajon.
