Pedagogu dhe analisti Afrim Osmani, i ftuar në studion e News24, ka analizuar përplasjet tregtare mes fuqive kryesore botërore, në dritën e strategjive të ndjekura nga ish-presidenti amerikan Donald Trump. Sipas Osmanit, tensionet nuk janë vetëm një lloj revanshi ekonomik, por paraqesin përplasje filozofish të thella që lidhen me mënyrën se si vendet e zhvilluara e shohin tregtinë dhe ndikimin global.
“Trump e sheh marrëdhënien tregtare si një lojë rezistence ku SHBA, sipas tij, ka kapacitet të rezistojë më shumë se Kina apo Bashkimi Europian. Ai aplikon një qasje të ashpër korporatiste, ku interesi kombëtar identifikohet me bilancin e kompanive të mëdha amerikane,” tha Osmani.
Ai shtoi se lëvizje si vendosja e tarifave ndaj importeve kineze apo produktet e BE-së, nuk janë thjesht taktika presioni, por pjesë e një filozofie më të gjerë ekonomike që nxit proteksionizmin dhe rivlerëson zinxhirët globalë të furnizimit.
Sipas Osmanit, kundërmasa e Kinës dhe reformimi i politikave bashkëpunuese të BE-së mund të zgjerojnë luftën tregtare në forma më komplekse, përtej tarifave – përfshirë kontrollin e teknologjisë, patentave dhe aksesit në tregje strategjike. Ai theksoi se modeli i “durimit të zgjatur” që ndjek SHBA, ka rreziqe të konsiderueshme afatgjata për partneritetet ndërkombëtare dhe për stabilitetin ekonomik global.
“Përplasja nuk ka të bëjë më vetëm me balanca import-eksporti, por me atë se kush do të imponojë standardet e së ardhmes në ekonomi, teknologji dhe burime,” përfundoi Osmani, duke lënë të hapur mundësinë për një rivalitet të zgjatur dhe potencialisht të rrezikshëm ekonomik mes fuqive botërore.
