Manchester United dhe Liverpool janë gati të përplasen në merkato për një nga talentet më të kërkuara të momentit, mesfushorin holandez Xavi Simons. Futbollisti 22-vjeçar është vënë në qendër të vëmendjes falë paraqitjeve të tij mbresëlënëse në Bundesligë, ku ka shkëlqyer me fanellën e RB Leipzig. Pasi u transferua në Gjermani për 50 milionë euro (plus bonuse), Simons ka treguar se është një nga talentet më premtues në futbollin europian, duke tërhequr interesimin e klubeve të mëdha.
Manchester United, i udhëhequr nga Erik ten Hag, e sheh Simons si një përforcim ideal për mesfushën, falë shkathtësisë së tij për të luajtur si organizator, por edhe më afër portës. Ten Hag është një admirues i vjetër i tij, që nga koha kur Simons bënte pjesë te akademia e Barcelonës e më pas kaloi tek Paris Saint-Germain.
Nga ana tjetër, Liverpool kërkon ta rinovojë mesfushën me lojtarë të rinj dhe teknikë, dhe profili i Simons përputhet me filozofinë e trajnerit Arne Slot, që pritet të ndërtojë një ekip të freskët e konkurues. Anfield po kërkon një lider të ri në mesfushë, dhe Simons shihet si një investim afatgjatë.
Garës mund t’i shtohet edhe interesimi i PSG-së, që ka një klauzolë për rikthimin e lojtarit, ndërkohë që Leipzig nuk ka ndërmend ta shesë lehtësisht, duke kërkuar jo më pak se 70 milionë euro për të liruar kartonin.
Me formën që ka treguar dhe kërkesat në rritje për shërbimet e tij, Xavi Simons pritet të jetë një nga emrat më të përfolur të kësaj vere, duke ndezur një tjetër “klasike” mes United dhe Liverpool jashtë fushe.
